Sorğuya başlamazdan əvvəl “konversiya terapiyası təcrübələri” dedikdə nəyin nəzərdə tutulduğunu və bu fenomenin keçirilən sorğu çərçivəsində əlaqəsini izah etmək istəyirik.
Konversiya terapiyası fərdin seksual oriyentasiyasını, gender kimliyini və ya ifadəsini boğmaq, hətta “dəyişdirmək” cəhdidir. Bu təcrübələr LGBTİ+ olmağın yanlış, qeyri-təbii, “sağalması” və ya “müalicəsi” mümkün bir vəziyyət olması inancına dayanır.
“Konversiya terapiyası” akt olaraq 4 əsas formada baş tuta və müxtəlif davranış, üsul və təcrübələrdən istifadəni əhatə edə bilər.
Ailə əsaslı müdaxilələr - gender və seksuallıq ilə bağlı gözləntilərə uyğunlaşmaq üçün fiziki və psixoloji zorakılığı, o cümlədən, məcburi tibbi və inanc əsaslı müdaxilələrə yönləndirmə, evlənmək və ya digər məcburedici üsullardan istifadəni əhatə edə bilər.
Din və ya inanc əsaslı təcrübələr - LGBTİ+ kimliyini “sağaltmağa” və ya “düzəltməyə” yönəlmiş molla ilə görüş, dua yazılması, pirlərə gedilməsi, o cümlədən, namaz qılınması kimi müxtəlif din və ya inanc əsaslı təcrübələri əhatə edə bilər.
Psixoloqla seanslar - seksual oriyentasiya və ya gender kimliyi ilə bağlı düşüncələri, hissləri və ya davranışları dəyişdirmək məqsədi daşıyan psixoloji məsləhət sessiyalarına yönləndirilməni əhatə edə bilər.
Tibbi müdaxilələr - LGBTİ+ kimliyi ilə əlaqəli düşüncələr və hissləri yatırmaq üçün dərmanların istifadəsi, məcburi hormonal terapiya, bəzi hallarda hətta elektrokonvulsif şok (elektroşok) və digər tibbi müdaxilələri əhatə edə bilər.
Bir çox LGBTİ+ fərdləri kimlikləri səbəbindən məruz qoyulduqları davranış və üsulların ilk baxışda konversiya terapiyasının bir forması olduğunu başa düşməyə bilərlər. Bu həm də ailə, dini və ya ənənəvi inanclar çərçivəsində sizə kömək etmək, qorumaq və ya bələdçilik etmək yolu kimi təqdim edilmiş ola bilər.
